1
Un lagarto do muro
queda parado ollando a miña sombra
porque é coma el de cores
e dime: " pero, tola, só a ti se che ocorre
pretender esgueirarte da túa sombra"
O animaliño non sabe
que ás veces son translúcida
e a miña sombra xoga a ser
o espectro da miña alma
estumballada ao sol
preguiceira
en azul negra e verde e amarela
con reflexos morados
dependendo
2
outro saurio de cores metalizadas
e máis grande ca o anterior
entra na casa ao mediodía
polo fachinelo da parte de atrás,
é un arnal das silveiras.
E queda ollando o mural xigantesco do cuarto,
ese que nunca darei rematado
porque vai mutando e está vivo.
Pídolle amablemente que se pire.
Nin caso.
Olla o muro pintado
olla para min
move alegremente o rabo
e agóchase nun lugar seguro
por exemplo detrás do armario.
Sei nese momento
que agardará que eu marche
para poder desprazarse a gusto
polas texturas de cores
ata conseguir incrustar os seus pensamentos
nelas.
Vémonos todos os veráns.
Xa somos amigos.
Empezo a detectar rastros metalizados
no lugar onde deseño durmida
soños de pedra.
